Ошто 1-класстын окуучусун "мал" деген мугалим кайра ишке алынган. Бул тууралуу Акыйкатчы институтунан билдиришти. Ош шаарынын тургуну Акыйкатчы институтуна анын баласынын укуктарын коргоо өтүнүчү менен кайрылган. Окуу жылы башталгандан кийин ал баласын жалпы билим берүү мектептеринин биринен алып, менчик мектепке киргизүүгө мажбур болгон, анткени мектепке өткөн жылы анын 1-класстагы уулун кемсинткен мугалим кайтып келген.

• 2022-жылдын сентябрь айында Ош шаарындагы жалпы билим берүү мектептеринин биринде мугалим 1-класстын окуучусун “мал” жана “акмак” деп тилдеп, баланы бетке чапкан. Ошондой эле ал  класстагы балдарды “жөндөмсүздөр, акылсыз бомждор” деп урушкан. Мунун баары уулунун смарт-саатына жазылып калган. Үн жазууну уккан ата-энелер мектеп жетекчилигине чара колдонуу талабы менен кайрылышкан. Үн жазуу ошондой эле социалдык тармактарга жарыяланган. Ал резонанс жаратып, башка окуучулардын ата-энелери да нааразы болушкан. Бул окуядан кийин мугалим 2022-жылы 30-сентябрда арызы менен жумуштан бошоого мажбур болгон.

Бирок 2023-жылдын 4-апрелинде ал кайрадан ушул эле мектепке мугалим болуп ишке кирген. Аталган фактыга окуучунун апасы нааразы болуп, адегенде мектеп жетекчилигине кайрылып, андан кийин алардан аракет болбогондо Акыйкатчы институтуна арыз жазган. Акыйкатчы институту 2023-жылдын май айынан бери Билим берүү министрлигине бир нече ирет расмий билдирүү жөнөтүп, баланын укуктарын сактоону камсыздоого жана чара колдонууга чакырган. Бирок август айынын соңуна чейин жооп болгон эмес. 21-августта министрликтен мугалимдин тажрыйбасын эске алып, кайрадан ишке алышканы айтылган жооп келген. Ушул эле катта баланын укуктарын коргоо жана мектеп бул багытта иш алып бара турганы эскертилген эмес. Анан калса министрлик мугалимдин кайтып келүүсүн ата-энелер да колдогонун белгилейт. Бирок институт Башкы прокуратурага мугалимдин аракетине баа берүү чакырыгы менен расмий билдирме жөнөткөн. Акыйкатчы институтуна келген көзөмөл органы берген расмий катта мугалим окуучуларды кемсинтүү жана басымырлоо менен Билим берүү жөнүндө мыйзамдын 29-беренесин бузганы айтылат. Ошондой эле 2023-жылдын 1-августунда аталган мектептин директоруна сөгүш жарыяланганы маалымдалган. Акыйкатчы институтунун Балдардын, аялдардын жана үй-бүлөнүн укуктарын коргоо бөлүмүнүн башчысы Наиля Токтосунова балдарын коргоо максатында аларды менчик мектепке берүүгө мажбур болгонун белгиледи. Бөлүм башчы берген маалыматка таянсак, 16-сентябрда окуучунун апасына менчик мектептен чалышып, документтерди алып кетүүнү айтышкан. Анын айтымында, менчик мектептин директору анын балдарын мектепке кабыл алуудан баш тарткан. “Силерди Ош шаарындагы бардык мектептердин “кара тизмесине” киргизип салышты деп айтып жатышат дейт ал. Ага айтып түшүндүрүүгө аракет кылдык, бирок директор уккан да жок. Мындай учурда эмне кылышыбыз керек? Башталгыч класстардын балдарына билим берилбей калабы?" - деген аргасы кеткен аял ыйлап. Акыйкатчы институту Министрлер кабинетин балдардын билим алууга карата укугун сактоону камсыздоого жана баланын укуктарын бузууга өтө эле одоно жол берген тараптарга чара колдонууга чакырат. “Билим берүү министрлигин педагогдун, ошондой эле шаардык билим берүү башкармалыгынын жетекчилигинин аракетине баа берүүгө чакырабыз. Кенже класстын балдарына жаман айтып жана тилдеген, аларды кыйкырып урушкан педагогдун мугалим болууга моралдык укугу барбы?" - деди Наиля Токтосунова.