"Айдоочу маршрутканы сүзгөнгө чейин эле көз жумган". ӨКМ башчысы Орусиядагы жол кырсыктын себебин айтты
"Орусияга барып келдик. Ал жакта тергөө иштери аяктап, жол кырсыкты жараткан адамга соттук-медициналык экспертиза дайындалган". Бул тууралуу ӨКМ башчысы Бообек Ажикеев билдирди.
"Унааны артынан сүзгөн адамдын денесин сойгондо, ал урунганга чейин эле жанын бериптир", - деди ал.
21-август күнү Орусиянын Ульянов облусунда орун алган жол кырсыгынан жалпы 16 адам каза таап, анын 14ү Кыргыз жараны экени такталган. Маркумдардын сөөгү 23-августта алып келинди. Ошондой эле 3 Кыргыз жараны жаракат алып, жергиликтүү бейтапканага жеткирилген.
