Испанияда кеминде 68 адамдын өмүрүн алган темир жол кырсыгынан каза болгондорду эскерүү үчүн үч күндүк аза күтүү жарыяланды. Транспорт министри Оскар Пуэнтенин айтымында, Толедо шаарына жакын жерде Renfe жана Iryo компанияларына таандык жогорку ылдамдыктагы поезддердин кагылышына автоматтык башкаруу системасындагы мүчүлүштүк себеп болгон.

Пуэнтенин маалымдашынча, диспетчердик борбор алгач бул тилкедеги бардык поезддердин кыймылын токтоткон. Бирок кийин кандай себептен кабыл алынганы түшүнүксүз чечим менен каттамдарды кайра жанданткан. Натыйжада кырсык болгон.

Коңшу Урда шаарындагы мектепте жакындарынын тагдырын билүүнү каалаган адамдар үчүн атайын пункт уюштурулду. Кызыл Чырым кызматкерлери келгендерге жардам көрсөтүүдө. AFP агенттигинин маалыматына караганда, алардын көбү көз жашын тыя албай турган абалда. Имараттын айланасында полиция кызматкерлери жана журналисттер чогулду.

Ал арада поезддер кагылышкан жерде издөө-куткаруу иштери уланууда, dpa агенттиги билдиргендей, түн ичинде рельстен чыгып кеткен вагондорду текшерүү үчүн үч оор жүк көтөрүүчү кран колдонулду.

Бул Испанияда бир жыл ичинде болгон экинчи ири поезд кырсыгы. Январь айында Андалусиядагы темир жол кырсыгынан 46 адам каза болгон.