Армениядагы шайлоодо Пашиняндын партиясы алдыга чыкты. Бул тууралуу Армениянын Борбордук шайлоо комиссиясынын маалыматтары көрсөтүүдө. Алдын ала жыйынтыктарга ылайык, премьер-министр Никол Пашинян жетектеген «Жарандык келишим» партиясы 57,14% добуш алды.

Оппозициялык «Күчтүү Армения» альянсы, аны армян тектүү орусиялык ишкер Самвел Карапетян жетектейт, 21,43% добуш топтоду.

Учурда 2005 шайлоо участогунун болгону 110ундагы добуштар гана саналып бүттү.

7-июнда өткөн парламенттик шайлоо Армениянын мындан аркы өнүгүү багытын — Батышка ыктоо же Россияга ыктоо жолун аныктайт. 2025-жылы Пашинян Евробиримдикке жакындашуу курсун мыйзам түрүндө бекитип, Ереванды Москва менен каршылашуу жолуна салган. Ошол эле учурда премьер Россия менен байланышты толук үзүүнү көздөбөй турганын баса белгилеп келет.

Ал эми оппозиция өлкөнүн Россия менен тыгыз байланышын сактап калууну жактайт.