Ички иштер органдары 39 жаштагы борбор калаанын тургуну даярдап жаткан ырайымсыз заказдык кылмыштын алдын алышты. Ыкчам маалыматтын негизинде укук коргоо кызматкерлери анын өз жубайын жок кылуу планын үзгүлтүккө учураткан. Тергөөдө белгилүү болгондой, мындай кан төгүү планына жеке жашоосундагы чыр себеп болгон: ал эки үй-бүлө менен жашап жүргөн.

Окуя эркектин аялдарынын бири (1989-жылы туулган) экинчи үй-бүлө бар экенин билип калгандан кийин күч алган. Аял жаңжал чыгарып, шектүүнүн айтымында, өзүнүн абалы жана балдарынын ден соолугу аркылуу аны шантаж кылган. Башка жол таппай, эркек «маселени» радикалдуу чечүүнү көздөп, жубайын өлтүрө турган адам издей баштаган.

Балдарынын энесинин өмүрү үчүн ал киллерге 10 миң доллар сунуштаган. Өлтүрүү ыкмасы катары муунтуп өлтүрүүнү тандаган. Аткаруучуга 2 миң доллар алдын ала берилген. Бирок укук коргоо кызматкерлери алдын ала чара көрүп, киллер кылмыш жасала электе кармалып, тергөө менен кызматташууга макул болгон.

20-апрелде операциянын акыркы этабы өткөрүлгөн. Шектүүгө аял өлдү дегендей жасалма сүрөттөр көрсөтүлгөн. «Буйрутма аткарылды» деп ишенгенден кийин, ал калган акчаны берип, ошол жерден кармалган. Бул факты боюнча «атайылап киши өлтүрүү» беренеси менен кылмыш иши козголуп, тергөө уланууда. Ошондой эле ички иштер органдары кылмышка аракет кылуу да жасалган кылмыштай эле катуу жазаланарын эскертишти.