Израилдин премьер-министри Биньямин Нетаньяху БУУнун Башкы ассамблеясында сөз сүйлөп жаткан учурда бир катар өлкөлөрдүн делегациялары жыйындар залынан чыгып кетишти. Премьер-министрдин сөзүнүн алдында дипломаттар залдан чыгуу үчүн кезекке турушкан.

Нетаньяху микрофонго жакындаганда, залда калган өкүлдөрдүн арасынан нааразы болгон кыйкырыктар да, кол чабуулар да угулду.

Иранга каршы АКШ менен Израилдин согушу тууралуу сөз кылган Нетаньяху: «Биз жеңишке жетебиз, башка жолубуз жок», — деди. Ал согуш баштоо чечимин өмүрүндөгү «эң оңой чечимдердин бири» деп атады. «Эгер биз муну кылбасак, баарыбыз өлмөкпүз. Бир күнү Иран эли эркиндикке жетет жана ал күн анчалык алыс эмес болушу мүмкүн», — деди Израилдин премьер-министри.

Нетаньяху Газа секторунун тургундарына карата геноцид жасалды деген айыптоолорду четке какты. Анын айтымында, Израиль ХАМАСка каршы согуш баштоо менен «геноциддин алдын алган».

Израилдин премьер-министри Нью-Йорктун мэри Зохран Мамдани тууралуу да айтып, аны антисемитизмге жана Нетаньяхунун БУУга сапарын үзгүлтүккө учуратууга аракет кылып жатат деп айыптады. «Мени унчукпай коюуга мажбурлай албайсыңар», — деди Нетаньяху.

Мамдани өз кезегинде Нетаньяхунун сөзүнө комментарий берип, Газа секторунда геноцид болуп жатат деген айыптоосун кайталады. Ошондой эле Гаагадагы сот тарабынан Нетаньяхуну камакка алуу боюнча берилген ордерди эске салды.

Буга чейин Мамдани Нетаньяхунун сапарына каршы нааразылык акцияларын өткөрүүгө чакырган. Натыйжада Израилдин премьер-министри сөз сүйлөп жаткан учурда Нью-Йорктогу БУУнун имараттарынын айланасына палестиналыктарды колдогон демонстранттар чогулду. Алардын арасында Мамдани менен жакын мамиледе болгон саясатчылар да бар.

Полициянын маалыматына караганда, акция учурунда жалпысынан 100гө жакын адам кармалган. Мамданинин өзү нааразылык акциясына катышкан жок.