Азербайжан Республикасынын президенти Ильхам Алиев кечээ, 30-июлда Кыргыз Республикасына мамлекеттик сапар менен келди. Президент Садыр Жапаров жогорку даражалуу конокту “Ысык-Көл” эл аралык аэропортунда тосуп алды.
 
Флагштокторго Кыргызстандын жана Азербайжандын мамлекеттик туулары илинип, килем төшөлүп, Ардак кароол ротасы тизилди. Перрондо ошондой эле кыргыз элинин бай маданий-тарыхый мурасын чагылдырган инсталляциялар көрсөтүлүп, этно-жоокерлер алгыр куштар жана тайгандар менен көчмөндөр маданиятынын элементтерин көрсөтүштү. Андан соң эки өлкөнүн лидерлери үчүн кыргыз жана азербайжан элдеринин музыкалык чыгармаларын аткарган кыргызстандык өнөрпоздордун катышуусунда кыска концерттик программа тартууланды.
 
Мамлекеттик сапардын алкагында мамлекет башчылары бүгүн, 31-июлда эки жактуу кызматташтыктын күн тартибиндеги актуалдуу маселелерди жана кызматташтыкты мындан ары чыңдоонун келечегин талкуулашат. Ошондой эле бир катар эки тараптуу документтерге кол коюу пландалууда.